تفاصيل إطلالة شريهان في افتتاح المتحف المصري الكبير

كشفت الفنانة شريهان تفاصيل إطلالتها في افتتاح المتحف المصري الكبير.

وأكدت شريهان خلال مداخلة هاتفية مع برنامج “الصورة مع لميس الحديدي”: “أول ما تشرفت باختياري لهذه المناسبة العظيمة جدا وهذا الحدث الكبير قعدت أفكر مين اللي ممكن اسمه يتحط جمب الحضارة المصرية ومين اللي ممكن ألبس من عنده وابقى فخورة وسعيدة ملقتش غير الغالي حبيبي وصديقي العالمي إيلي صعب”.

وتابعت شريهان: “رحت له قلت له أنا محتاجاك نحفر مع بعض خط على حجر لو اتحط جنب الحضارة المصرية يليق بها، كان في وقت ضيق جدا لأن عنده عروض جديدة، القماشة اتطرزت فورا في إيطاليا وجواها مطرزة بالشغل الفرعوني، وكان كل حلمي أن يكون الحجر المصري نفسه هو اللامع، عدد العاملين اللي طرزوا والقماشة اتصنعت بسرعة أنا فخورة وسعيدة إني كنت ارتدي من إيلي صعب، كنت بقوله الأمانة اللي شايلاها أكبر مني بكتير أنا مين جنب الحضارة المصرية لكن هو إداني القوة”

وأضافت شريهان لتتحدث عن شعورها بعد المشاركة في الحفل قائلة: “الشرف، كل الشرف لي، ما فيش أعظم من النهارده، ده تتويج لعمري ومسيرتي. أنا فخورة وسعيدة، وكنت مع أبطال مصريين عظام محمد سعدي، وهشام نزيه، ومازن المتجول، والمايسترو هاني أباظة، مش عاوزة أنسى أي حد، لأنهم جميعًا عظماء”.

وأردفت شريهان: مش عارفة ألمّلم مشاعري شريهان دلوقتي عاوزة تصلي بقية عمرها شكرًا وامتنانًا لله، شكر له على هذا التتويج وهذا الشرف، لأنه شرف ما بعده شرف، على أرض بلدي.