سعيد الطويل: أخبار عالريق.. للأسف ما في حد نجي كلهم ماتوا
شبكة الخامسة للأنباء - غزة
أخبار_عالريق نشرة استثنائية 996
يكتبها / سعيد الطويل
■للأسف …ما في حد نجي كلهم ماتوا بالحريق وما في حد يروي القصة من بعدهم ويحكي شو صار معاهم بآخر لحظات حياتهم؟
■واحد وعشرين شهـيد معظمهم من دار أبو ريا بمخيم جباليا ،فش ولا واحد طلع فيهم عايش صعدت أرواحهم للسما بعد حريق حرق قلوبنا وكواها كوي من بعدهم
■عيلة كاملة فيها الجد والأب والأم وأولادهم وأولاد أولادهم وبناتهم ،ما ضل وراهم حتى ذكرياتهم ولا مكان معيشتهم
■الخاطر انكسر وانقلب الفرح لحزن ولسة ما تعلقت شهادة المهندس ماهر إللي خلص دكتوراة لسة من كم يوم وروح من السفر فرحان بده يحتفل فيها مع عيلته المميزة
■اليوم في حداد واضراب شامل في كل القطاع وحيصلوا ان شاء الله صلاة الغائب في كل جوامع فلسطين على أرواحهم
■جنازة مهيبة ورسمية حتطلع اليوم بعد صلاة الجمعة من جباليا لتشييع الشهداء لمثواهم الأخير
■الداخلية بتقول انه الحريق سببه بنزين متخزن بالدار والتحقيقات لسة شغالة
■أبو مازن أعلن الحداد ووزيرة الصحة قالت جاهزين لتحويل أي مصاب للضفة وهنية تبنى جميع الشهـداء
■مصر والأردن والأمم المتحدة والاتحاد الأوروبي والصليب الأحمر قدموا التعزية لشعبنا بالمصاب الجلل
■التغت كل الأفراح والحفلات مبارح واليوم في شمال غزة
■أكثر مشهد كان موجع حسب ما شافوا الجيران الولد الصغير إللي كان بيستنجد بأي حد عالشباك وهو عالحماية بيصرخ وما حد قدر ينقذوا
■أمه وأبوه سمعوا طقطقة عظامه وصرخاته والنار بتاكل فيه وما حد قدر حتى ينقذ حاله
سلام لغزة المُتعبة المنهكة ، سلام لرمادها وحجرها، لضجيجها الساكت خلف الغبار 💔…
السلام عليك ياحج فرج الراجل الأصيل طيب الذكر ..السلام عليك وعلى روحك يا دكتور صبحي العم أبو ماهر إللي خدم الكبير والصغير بالعلاج الطبيعي بالوكالة ، للحجة الأصيلة أم ماهر المحامية القديرة ..الله يرحم روحك ويكتبلك كل الأجر ..
السلام لروحك يا دكتور ماهر وانت بتحمل شهادة أعلى وأحسن ان شاء الله عند ربنا من الدكتوراة ولمرتك وأولادك كل التحية والرحمة والسلام
لأخوك الصيدلي الخدوم نادر ومرته المربية روز وأولادهم الأربعة إللي ارتقوا كلهم حتى ما حد يتحسر عالثاني ..
لأخواتكم وأخواتنا كلنا فاتن وفدوى وسارة ..الماجدات الأميرات طيبات الأصل …
لأولاد فاتن الثلاثة إللي فاضت أرواحهم كمان للرحمن معتز ورهف وبتول..
لكل صرخة وكل صوت نادى وما حد قد يلبيه ..
بنقول إنا لله وإنا إليه راجعون
المصاب جلل
وعظم الله أجرنا كلنا في فاجعة مخيم جباليا💔
حريق جباليا
ادعولهم بالرحمة والمغفرة واكسبوا الصلاة عالنبي بيوم الجمعة وكان الله بعونا جميعاً
الجمعة 18-11-2022 🖤💔
