كلمتين عالسريع.. رسالة من القلب للمراقبين والمصحيين في امتحانات التوجيهي ..

بقلم/ سعيد الطويل

رسالة من القلب .. للمراقبين والمصحيين في امتحانات التوجيهي ..

باختصار الورق إللي بين إيديكم تعب وجهد سنين طويلة الكل كان بيستناها ليحصد ثمرة هالسنين..وآخر سنة بالدراسة كانت مليانة خوف وقلق وضغط وتعب وتركيز وسهر ومصاريف وحرب ونفسية ..وشد أعصاب

يعني الموضوع مش بس ورقة امتحان والسلام
إللي بين إيديكم قلوب الأمهات تعبت وثابرت لتوصل لهالحظة ودعوات بكل سجدة ومستقبل وحلم وأول الخطوات عشان يشقوا طريقهم

لما تلاقوا طالب مش مجاوب ما تنتقموا منه ،شوفوا السؤال إللي بعده ..هو مش فاشل ولا ملوعب ،بس الله يعلم شو ظروفه ..راعوه بالتصحيح لو فلت سؤال إللي بعده حيزبط أكيد الفكرة صح بس الجواب مش راضي يزبط معه

أصلا فش طالب فاشل بيوصل للتوجيهي ..لأنه توجيهي عنوان مرحلة وفرحة ومستقبل

صدقوني فش حد بيحب يشوف أبوه وأمه مش مبسوطين وبيعيطوا يوم النتائج ، وبيخسر رهان الفرحة وبيقرر يخذلهم ..

باختصار الطالب إللي اجتهد ودرس وحضَّر وسهر ودفع مصاري من مصروفه وتحويشة أهله للدروس مش مستعد يسقط ويرسب بأهم مرحلة بحياته
بس رهبة توجيهي بتخلي المخ يبطل يجمع
راعوهم الله يرضى عليكم وكونوا سبب بصناعة فرحتهم وجبر خاطرهم

دعواتكم لطلبة التوجيهي