محمد رمضان في “الحكاية”: خناقة الأعلى أجرا هدفها مضايقتي ..

حل النجم محمد رمضان ضيفا لأول مرة على برنامج “الحكاية”، الذي يقدمه الإعلامي عمرو أديب عبر قناة MBC مصر، حيث تحدث في الجزء الأول من اللقاء عن غيابه عن الدراما التليفزيونية لمدة 3 سنوات، وسعيه لتحقيق النجاح في إفريقيا، وارتفاع أجره إلى جانب مواضيع أخرى.

وقال محمد رمضان: “أنا قعدت 3 سنين في البيت، وغيابي عن الدراما كان بإرادتي، كنت بشوف إشاعات كتير ده ممنوع. كنت عايز أركز في الفيلم ده، وأنا في الآخر دخلت الدراما بعد نجاحي في السينما، ومش هنسى فضل السينما علي، وكان تخوفي من الدراما إنها تاخدني من السينما وقد كان. فجأة لقيت نفسي عامل 8 مسلسلات وأنا سني 36 ولا 37 سنة”.

وكشف محمد رمضان عن أنه يقوم بتأسيس جمعية خيرية قائلا: “بعد التعاقد على “الأسطورة” كنت الأعلى أجر بـ 45 مليون جنيه .. وما دام إتكلمنا على فكرة الأجر لازم نقول إحنا شغالين على إيه. أنا دلوقتي بأسس جمعيتي الخيرية الأولى، لأن في الآخر الرقم ده أنا بشوف الناس شركاء فيه”.

وتابع: “يوم ما فكرت أمثل وعشقت هذه المهنة ولا كان في دماغي أكسب منها فلوس، كنت بروح أنا واصحابي نكنس المسرج عشان عايزين نمثل”.

تحدث محمد رمضان عن جدل الأعلى أجرا الذي ثار في الفترة الماضية قائلا: “أنا بشوف إن سببها سني، مثلا لما كان أعلى أجر في مصر أستاذ عادل إمام مكانش في حد عمره يقول أنا أعلى أجر. هو فكرة إزاي في السن ده وبياخد الرقم ده، في فكرة تعالوا نرخم عليه … أنا حتى لما قلت أعلى أجر كنت عامل “الأسطورة” وكنت صغير”.

وتطرق الحوار إلى سعي محمد رمضان لتحقيق جماهيرية في إفريقيا، وهو ما قال عنه: “أنا رحت أفريقيا وكإني ولا حاجة، وكانوا يحجزولي في الأوتيل أوضة دوبل أنا وأخويا .. سنة 2019 في نجم طلبت أقابله رفض يقابلني، هذا النجم في 2020 عملنا مع بعض أغنية عالمية كبيرة جدا وهو اللي طلب، لأنه بدأ يشوف خطوات، الإستايلست نفس الإستايلست، ويشوف رمضان بيعمل حاجة في دبي”.

ونفى محمد رمضان دفع مبالغ مالية للفنانين الذين يتعاون معهم في أغانيه قائلا: “فكرة إني أدفع فلوس لمغني عشان يشتغل معايا ده شيء مرفوض تماما، ودي نصيحتي حتى للشباب الصغير. سيدنا علي كرم الله وجهه قال من أخذ شيئا قبل أوانه عوقب بحرمانه، لازم الفنان التاني يكون شايف إن التعاون علاقة فوز فوز”

تحدث محمد رمضان عن غيرته من الشعبية التي حظي به نجوم تركيا في مصر بقوله: “من الحاجات اللي كنت أغير منها جدا زمان قبل ما أعمل أول مسلسل إنه ليه جمهورنا المصري يعلق صورة ممثل تركي في البيت، عشان عامل مسلسل ناجح في مصر؟ فين نجومنا؟ لما عملت “ابن حلال” ولقيت الناس بتعلق صورة “حبيشة” ومحلات وميكروباصات كإن ربنا بيقوللي أنا هراضيك”.

وحول المرأة في حياته، قال محمد رمضان: “الستات مهمين جدا. مثلا في حياتي أمي أول من آمنت بي، وزوجتي من أول الناس اللي شجعتني في الغنا. صفات الست اللي أحبها هي مراتي، وأحب الست العاقلة، حتى لو أصغر تبقى أكبر بدماغها”.

يذكر أن محمد رمضان يعرض له حاليا في السينما فيلم “أسد”، وتدور أحداثه في مصر في القرن التاسع عشر، ويتناول قصة “أسد”، العبد الذي يحمل روحاً صلبة متمردة، ويركز هذا العمل الدرامي التاريخي على رحلة أسد بعد أن يُشعِل حبٌ ممنوعٌ بينه وبين امرأة حرة شرارة المواجهة مع أسياده، لكن عندما يُسلب من أسد أثمن ما يملك، يتحول التحدي الصامت إلى ثورة غاضبة، في صراع بطولي لا يضمن النجاة فيه لأحد، معركة أسد لن تحدد مصيره فقط، بل مصير العبودية في البلاد إلى الأبد.