فشة غل

بقلم/سعيد الطويل

الوضع الحالي من الطبيعي انه يخلي الناس تتفشش ببعض وتقاتل بدبان وجهها كمان

أينعم ..مش تبرير،لكن الفلس وضيق الحال كمان بيعمل أكثر من هيك .

الناس بتلاقيها مكبوتة ومخنوقة ومش طايقة حالها عشان هيك بتروح تعمل جولة عالفيس بوك بتشوف فيه كمية كئآبة منتشرة على صفحة هان وصفحة هناك ،في منها بتبخ سم بعيد عنكم وفي صفحات مرتبة وفيها كل الخير ،فلو شافت هذه الناس الصفحات المليانة حقد وحسد معيشة وعبارات ومنشورات ملهاش لازمة بتلكد معاها وبتبلش تعلق ع أي منشور أو أي قصة جديدة بالبلد سواء بقناعة أو بدون…بأجندة أو بدون الموضوع مش مرتبط بأي حدث طبعا ..المهم الفكرة انه هذا الشخص بده يعلق وشو ما يصير بعدها مش مشكلة..وبيحط راسه بعدها وبينام..وغيره ما بينام الليل وهو بيفكر والقلق والأرق والقهر مسيطر عليه ،

الموضوع يعني فيه #فشة_غل مش أكثر …

تخيل الوجه الآخر .. انه راجل ربنا مكرمه بوظيفة محترمة ومقرش وبيروح عالدار بيلاقي التكييف شغال ومرته محضرة أزكى غداء وعاملة شاف عصير جوافة مرتب ،وأولاده واحد بالدرس وبنته بترتب بغرفتها ..
وبعد الغداء بيلاقي صنيية هالبسبوسة نزلت عالطاولة..

وقتها النفسية حتتعدل ومش حيكون فاضي يلاحق القصص الفارطة
ولو حط راسه ونام ساعتين زمن وصحي قعد عالفيس حتلاقيه شرد يتصفح شوية عالانترنت حاجة تفيده يا إما سحب حاله وراح زيارة ع نسايبه..

ما علينا هذه مجرد فكرة حسيت انه الناس فعلا مضغوطة لكن معدنها طيب وأحيانا ضغطتها هو إللي بيوصل النا هذه الصورة السلبية

عشان هيك الله يسعدك حاول قدر الإمكان تترك غيرك بحاله وما تشغل حالك وفكرك فيه وراعي مشاعر غيرك وانه تعليقك ممكن يسبب مشكلة وانت مش ماخذ بالك
أو تسبب أذى نفسي وانت قاصد أو التعليق مش مقصود
الناس فيها إللي مكفيها حاول تكون بلسم شافي صاحب كلمة حلوة بترفع المعنوية وبتجبر الخاطر أحسن وأفضل وكمان فيها أجر عند ربنا ،حاول تكون انسان واعي مثقف ما تركب الموجة ولا تحرج غيرك ،ولا تكسر خاطره
الحياة محطة قصيرة وهالعالم الافتراضي صار مليان مشاكل صارت تترجم وتنتقل لأرض الواقع وتسبب حقد وحسد معيشة ومشاكل إلها أول ما إلها آخر

وسلامتك وتعيش